المــــــــــــــــر واللي أمر منو

المــــــــــــــر واللى أمرّ منه











* تقعد عاطل ولا تموت فى البحر؟.. تستلفى علشان تروحى مستشفى خاص ولاّ تولدى فى مستشفى حكومى وربنا يستر؟.. تاكل طوب وتعيش ولاّ تاكل لحمة ويجيلك تسمم؟.. تقعدى عانس ولا تتجوزى نصاب؟


أنت فى مصر...........، إذن أنت محاصر بين اختيارين،


الأول: سيئ،

والثانى: طبعا أسوأ،



وفى أغلب الأحيان يكون المثل القائل بأننا «نطلع من نقرة نقع فى دحديرة» هو الوصف المثالى لماضينا وحاضرنا ومستقبلنا، وما بين النقرة والدحديرة، يسكن الشعب المصرى وكأنه فى شقة تمليك أربع غرف وصالة وحمامين وتلات مطابخ وفارنده، إن راح شمال، يبقى فى النقرة، وإن مال لليمين وقع فى الدحديرة، ولعل القول السائر والمثل القائل: «يا صابت يا اتنين عور« إن دل على شىء إنما يدل على أننا بالفعل عور، لكن فى عين واحدة والنتيجة المتوقعة أن نفوز باتنين عور، أى أننا إن لم نصبر على المر، فالنتيجة الطبيعية هى أن نفوز باللى أمر منه، أو بالمر، وبالمرة..


تجدر الإشارة هنا إلى أن المصريين يعتبرون «المر» من مستلزمات حياتهم الرئيسية، ولهذا يبتكرون أغانى عديدة تتغنى بالصبر والمر، لا لكى ينعتقوا منه، أو يذهب عنهم، بل لكى يحتملوا مرارته، وفى ذلك يقول المغنى «سألت ع الصبر قالوا الصبر له عجان/ بيزودوا بالعسل ويدوبوا دوبان/ لاجل المرار يتبلع/ ويريح التعبان» ولأن موال الصبر والمر واللى أمر منه ممتد وطويل ومستمر فى كل العصور، جمعنا هنا أشهر حالات المر بالإضافة طبعا إلى اللى أمرّ منه، وعرضناها حتى يعلم كل مصرى ماذا ينتظره إذا ما فكر فى اختيار أحد الإجابتين.








1 - خطف


المر: عندما تبحث عمن يسلفك لكى تدفع فاتورة الولادة لزوجتك، فلا تجد.


اللى أمر منه: أن تضطر زوجتك أن تلد فى أحد المستشفيات الحكومية، ويأتى من يخطف ابنتك أو ابنك وهو مازال رضيعا.


2 - الشقة


المر: أن تبيع ذهب زوجتك وتستلف بـ«الفايظ» لكى تدفع مقدم شقة تلملم بقايا أسرتك بين أربع حيطان.


اللى أمر منه: أن تكتشف بمحض الصدفة أن الأرض التى أقيمت عليها الشقة بتاعت الدولة، وأن العمارة اللى أخدتها لازم تتهد وتبقى نهايتك خيمة من خيم الإيواء.


3 - المواصلات


المر: تفضل تجمع فلوس عربية بالتقسيط ترحمك من زحمة المواصلات وتتسلمها بالفعل.


اللى أمر منه: أن يقع لك حادث، وتصاب إصابة بالغة، وتفقد العربية ومعها صحتك، وحتى متبقاش قادر ترجع تانى تتشعبط فى الأتوبيسات.


4 - سن المعاش


المر: لما تكون موظف غلبان كل اللى تملكه مرتب لا يزيد على 250 جنيها وبعد تفكير تقرر تطلع معاش مبكر.


اللى أمر منه: إن الشركة تفلس وبدل ما تاخد مكافأة نهاية الخدمة فلوس تاخدها بضاعة تسرح بيها فى الشارع.


5 - اللحمة:


المر: إن مراتك تفضل تربط الحزام طول الشهر علشان كيلو لحمة للعيال.


اللى أمر منه: أن تصاب أسرتك بالتسمم لأن اللحمة طلعت غير صالحة للاستخدام الآدمى.


6 - جمصة ولا مارينا؟


المر: إنك تدخل جمعية مع زمايلك فى الشغل علشان توفر مصاريف المصيف أسبوع فى السنة مع الولاد.


اللى أمر منه: إنك تركب الأتوبيس بعد ما قبضت الجمعية فتتنشل منك، وتقضى الصيف فى البيت بين الأربع حيطان، ولسه قدامك سنة لقدام تسدد فى الجمعية اللى أكيد الحرامى خدها عشان يصيف بيها.


7 - على وش جواز


المر: أن تقرر الزواج بعد أن وصل عمرك للأربعين بعد قصة حب عنيفة وخطوبة دامت 10 سنوات فتطلب سلفة جواز من عملك.


اللى أمر منه: إن السلفة ماتكفيش أى حاجة، وتطلع زى قلتها، فتفسخ الخطوبة، وتفكر تعمل إيه بالسلفة، تعمل إيه؟ تعمل إيه؟ فتشارك على «تربة»، عشان تعيش آخرتك بشكل كويس.


8 - حج مبرور


المر:أنك حلم تشوف أمك لأنها نفسها تزور الكعبة، وتنتظر عشر سنوات.


اللى أمر منه: إن والدتك تروح تحج وتروح تزور النبى لكن شركة السياحة تنصب عليها وترميها فى الصحرا وتشوف الويل.


9ـ مكتب توريد العمالة


المر: إن أبوك يبيع الكام قيراط اللى حيلته ويديك الفلوس علشان تسافر وتدور على فرصة عمل فى أوروبا.


اللى أمر منه: أن تخضع لعملية نصب وتسافر على مركب، يرميك صاحبها فى البحر فيقبض البوليس الدولى عليك ليتم ترحيلك إلى بلادك إيد ورا وإيد قدام.


10 - ابسط يا حاج بنتك جالها عريس


المر: لما يبقى عندك خمس بنات عايز تسترهم، وتضطر تقبل أول عريس يدق بابك لأنه غنى ومش هايكلفك حاجة.


اللى أمر منه: إنك تبيع اللى وراك واللى قدامك عشان تجهز البنت، وفى الآخر يطلع نصاب ويتقبض عليه وترجع بنتك ومعاها ابنها أو بنتها وواخدة لقب مطلقة، وبدل ما تخلص من واحدة تلاقى اتنين.


11 - أزمة عالمية


المر: لما تقرر تشتغل عامل نظافة وانت خريج بكالوريوس تجارة وعندك اربع اخوات فى مراحل التعليم، ولسه المشوار طويل.


اللى أمر منه: إن الشركة الخاصة اللى بتشتغل تبعها تستغنى عنك وتضطر تروح شركة تانية بنص المرتب.


12 - الناجح يرفع إيده.


المر: لما تكون متفوق فى الجامعة وبتوفر على أهلك مصاريف سنوات الدراسة على أمل تتعين فى الجامعة.


اللى أمر منه: إن والدك يتعب ويتوفى ويبقى مطلوب منك تصرف على عيلة من تسع أفراد وتضطر تبيع عقلك لواحد هايدفع اكتر لأنك غلبان مش حمل مصاريف الماجستير ولا الدكتوراة.


13 - ألف سلامة.. المؤمن دايما مصاب


المر: لما تصاب بفشل كلوى والمفروض تغسل مرتين فى الأسبوع، وما يبقاش حيلتك تمن الغسيل وتناضل علشان تتعالج على نفقة الدولة.


اللى أمر منه: إنك تحصل على قرار العلاج ويكون نصيبك فى مستشفى حكومى كبير، وتكتشف بالصدفة انه اتنقلت لك عدوى الإيدز علشان الجهاز اللى بتغسل عليه


14 - أنت موهوب يا على..


المر: لما تبقى شاب عندك موهبة وبتألف وتلحن بس ما عندكش واسطة ونفسك تحقق حلمك لكن ما حيلتكش حاجة ومش لاقى تاكل.


اللى أمر منه: إنك تضطر تبيع أغانيك وألحانك علشان تعيش، وتموت كل أحلامك وتبقى آخرتها يجيلك السكر وضغط الدم.


15 - اللى ما يرضاش بالبلحة يرضى بنواها.


المر: إنك تكون بتشتغل ليل نهار علشان تكفى العيال وتكتشف إن ابنك ملموم على شلة بايظة ومدمن مخدرات.


اللى أمر منه: إنك تكتشف إن ابنك تحول إلى حرامى علشان يلاقى تمن الهيروين، ويتمسك فى قضية تعاطى ويدخل السجن.


16ـ بس ادعى ربنا يفتحها فى وشك... بس!!


المر: إن جوزك يموت ويسيب خمس عيال متشعبطين فى رقبتك وكل همك تربيهم بالحلال.


اللى أمر منه: كل الأبواب بتتسد فى وشك وتضطرى تبيعى كليتك علشان تلاقى تأكليهم.


17 - عملوها الوحوش.


المر: إنك تطلعى تلاقى أبوكى وأمك متطلقين وكل واحد اتجوز واتبهدلتم فى الشوارع لأن جوز امك ومرات أبوكى مش عايزنكم تعيشوا معاهم.


اللى أمر منه: تنزلى الشارع ما تلاقيش إلا كلاب الشوارع تنهش فى لحمك وتبقى نهايتك اغتصاب وآخرتها ملف فى الآداب.


18 - الإيد البطالة


المر: إنك ما تلاقيش شغل فتعمل قرض من البنك بضمان الشقة اللى عايش فيها انت ومراتك وده كل اللى ورثته عن أبوك وتشترى تاكسى تشتغل عليه.


اللى أمر منه: إنه يطلع عليك شوية حرامية يخدروك ويسرقوا التاكسى، ويبقى المفروض انك تسدد قرض البنك أو تتسجن.


19 - يا تموت.. تموت


المر: لما تكون البورصة عملك ومكسبك وأملك فى مستقبل مشرق لأولادك وحاطط كل فلوسك فيها.


اللى أمر منه: إنك تخسر كل فلوسك فى البورصة وما تلاقيش تاكل ويبقى قدامك خيارين، إما تنتحر أو تنزل تشحت فى الشوارع فتختار إنك تضرب نفسك بالرصاص وتخلص من حياتك.


20 - الباشا عايز كده


المر: إنك توافق تكتب على نفسك وصولات أمانة مقابل توك توك تشتغل عليه لأن دى الحاجة الوحيدة اللى تعرفها وتخليك تصرف على أمك واخواتك.


اللى أمر منه: إن أمين شرطة يستقصدك ويقرفك فى الرايحة والجاية وتدفع له كل اللى بتكسبه فى اليوم، وفى الآخر يهددك بأنه هياخد التوك توك، فما تلاقيش إلا إنك تدلق على نفسك جاز والأمين يولع فيك.


21 - معلش خطأ مهنى


المر: انك تتمنى ضفر عيل ولد ولاّ بنت، وتلف على دكاترة مصر وأولياء الله الصالحين، وتستلف من طوب الأرض، وتضطر تشتغل ليل نهار علشان تكفى مصاريف العلاج.


اللى أمر منه: إن مراتك تحمل وتولد الولد اللى نفسك فيه، بس الدكتور «منه لله» نسى فى بطنها المشرط، وبدل ما تخرجوا انتم التلاتة سوا للبيت تخرج انت وابنك بس، مش عارف مين اللى هيربيه.


22 - قلعة الكبش واحد


المر: إنك تنطرد من البيت اللى اتولدت فيه واتجوزت فيه، لأن صاحب البيت جاب له أمر إزالة.
وما تلاقيش إلا انك تبنى عشة خشب تسترك انت وولادك.


اللى أمر منه: إنك تيجى حريقة تولع فى العشش كلها وتقضى على المكان الوحيد اللى فاضل ليك، وما تلاقيش إلا انك تبات فى الشارع.


23 - عملية الزايدة


المر: إنك تقع من طولك لأنك محتاج تعمل عملية الزايدة، وعشان انت مش لاقى تاكل عيش حاف تضطر تدخل مستشفى حكومى.


اللى أمر منه: إنك تقوم بالسلامة وتشيل الزايدة ولأن الدكتور ذمته واسعة شويه وإيديه طويلة حبتين ياخد كليتك فى طريقه، وتكتشف الكارثة بعد سنتين وحلنى لما حقك تعرف تجيبه، وحتى لو جبته، تفتكر كليتك هترجع تانى؟